كتير من الأهل اول مايعرف ان ابنه أو بنته عندهم قدم مخلبية من دكتور عظام الأطفال ويتكلم معاهم علي جلسات الجبس الدوري ثم ارتداء الدانس براون بيبدأ يفكروا يعني ايه دانس براون ، شكلها ازاي، هيلبسها قد ايه وغيرها من الأسئلة المحيره والغريبه عن أي حد لم يواجه المشكله ده قبل كده سواء في عائلة الاب أو عائلة الام
انا جاي النهارده احاول اجاوب علي أغلب الأسئلة اللي بتجي في دماغ حضراتكم
📌 يعني ايه الدانس براون ❓️
هي نوع من الجبائر أو الدعامات الخاصة تستخدم بعد انتهاء جلسات الجبس الدوري لحالات القدم المخلبية سواء عملنا تطويل ل وتر اكيليس أو لا وتكون عدد اثنين جبيره ل القدمين حتي لو قدم واحده فقط هي المصابة يصل بين الجبيره بار معدني يريط بين الجبيره وهذا الاتصال بيكون عن طريق مفصل يسمح بتغير الزاويه المراده
كما أنها تحتوي علي شرائط تربط القدم ويثبتها داخل الجبيرة كما أنها تحتوي علي فتحه بالكعب للتأكد ان كعب القدم واصل لنهاية الجبيرة
📌مين اللي اخترع جبيره الدانس بروان❓️
هو السير دانس براون Sir Denis Browne وهو الجراح الذي صمّمها / استخدمها أول مرة. عاش بين 1892 و1967، ويُعتبر أحد رواد جراحة العظام للأطفال في المملكة المتحدة. و أول وصف معروف للجبيرة كان عام 1934.
📌مده ارتداء الدانس براون (كام ساعة ولمدة قد ايه) ❓️
الطفل بيلبس الدانس بروان بعد انتهاء الجبس الدوري سواء احتاج الطفل تطويل وتر أو لا لمده ٢٣ ساعه يوميا لمده اربع شهور ثم وقت النوم لمده اربع سنوات
📌هل الدانس براون بتعدل وتصلح اعوجاج القدم المخلبية ❓️
الدانس بروان لا يقوم باستعدال قدم مخلبية الدانس براون بيحافظ علي قدم معدولة فقط فلابد من استعدال الاعوجاج اولا بالجبس الدوري
📌هل الجبيرة مؤلمة ❓️
لا، لكنها قد تكون غير مريحة أول يومين فقط و الطفل يتأقلم عادة خلال 48–72 ساعة
لو في ألم شديد أو احمرار مستمر لازم مراجعة الطبيب.
📌هل الطفل يقدر يتحرك أو يلعب وهو لابسها❓️
نعم، الأطفال يقدرون يركلوا ويتقلبوا يمين وشمال ، الحركة مفيدة لأنها تساعد على شد العضلات وتمديدها
ممنوع فقط المشي بها لأنها ليست مصممة للمشي.
📌نعمل إيه لو الطفل حاول يخلع الجبيرة❓️
عادي في البداية لأنه مش متعود ممكن استخدم شراب قطني خفيف و تأكد إن الأربطة مربوطة صح و ثبتها كويس لكن من غير شد زائد و اشغل الطفل بلعبة أو رضاعة في وقت التركيب
📌هل الجبيرة ممكن تعوج رجل الطفل❓️
لا، الجبيرة مصممة لتصحيح وليس لتشويه.
لو حصل: اعوجاج واضح او احمرار شديد او ألم ، لازم مراجعة الطبيب لأنها علامات إن المقاس أو التركيب مش صحيح.
📌هل ينفع نوقف الجبيرة فجأة ❓️
لا. الإيقاف المفاجئ ممكن يؤدي إلى رجوع التشوه بسرعة و يجب الالتزام بالمدة التي يحددها الطبيب.
